اولوب يوللرك حددن زياده مخوف اولديغنى بيان و كندو - لرى يولدن صاپوب كوهسارلردن هزار زحمتله كلدكلرينى ذكر ايتملريله سكز يوز يكرمى بش محرمنك نصفنه دكين سكجو شهرنده اقامت اولنوب بعده قراوله وارلدقده اهالئ قلعه مملكت ختايه داخل اولديغكزده دفتر اولنديغى كبى خروج وقتنده دخى دفتر اولنمق قاعدهء مملكتدر ديو جمله‌يى يازدقلرى دفتر ايله تطبيق و تحرير ايلديلر . شهر مزبوره وصوللرى سكز يوز يكرمى اوچ سنه‌سى شعباننك اون طقوزنجى جمعه كونى اولوب خروجلرى يكرمى بش محرمنك اون بشنجى جمعه كونى اولدى . و قطاع طريق و همندن چول يولى اختيار اولنوب ربيع الاولك سكزنجى كونى چولدن چقوب بر قاچ ايام اول صحرالرده توقف و جماذى الاخره‌نك طقوزنجى كونى ختن و رجبك آلتنجى كونى كاشغر شهرينه كلندى . بعده عقبهء اندكاندن كچلدكده ايلجيلرك بعضيسى سمرقند يولنه كيدوب ناقل حكايات رفيقى ايله بدخشان يولندن شعبانك يكرمى برنده حصار شادمانه و رمضانك غره سنده بلخه و اوننجى كونى هراته و اصل اولديغنى روايت و ختم طومار حكايت ايلدى .